Fæðingarorlof verði 12 mánuðir og greiðsluþak hækkað í 600 þúsund

Fæðingarorlof verði 12 mánuðir og greiðsluþak hækkað í 600 þúsund krónur, barnabætur hækkaðar og barnaföt verði án virðisaukaskatts. Mikilvægt er að stuðla að því að sveitarfélögin geti boðið upp á leikskóla strax að loknu fæðingarorlofi, þannig að samfella verði tryggð í umönnun barna. Brýnt er að leikskólar séu mannaðir fagfólki. Framsóknarmenn vilja að foreldrar sem þurfa að dvelja fjarri heimili sínu vegna fæðingar barns fái styrk úr fæðingaorlofssjóði til að mæta þeim tíma þannig að fæðingaorlof sé nýtt í þágu barns að lokinni fæðingu.

Úr kosningastefnuskrá Framsóknar og ályktunum 34. flokksþingsins bls. 18.

Athugasemdir

[Jón Steinar Ragnarsson, 23.10.2016 kl. 21:19]

Gleymist að nefna hvernig eigi að fjármagna þessa fríu peninga. Ég legg til að þetta verði tekið af ellilífeyrisþegum. Það þarf absolútt að hvetja íslendinga til að hrúga niður börnum eins og kanínur svo þeir geti nú hvaft það að aðal framfærslu á besta aldurskeiði. Mjög gott fyrir framleiðnina í landinu væntanlega. 

Um að gera að gefa svona stórslegin loforð til þeirra sem síst mæta á kjörstað.

En í alvöru talað. Eruð þið algerlega komnir í lalaland í örvæntingunni?

[Ragnar Geir Brynjólfsson, 24.10.2016 kl. 17:30]

Takk fyrir innlitið Jón.

Ekki líst mér vel á þá tillögu að "þetta verði tekið af ellilífeyrisþegum" enda ekki þörf á slíku. Fjármögnun á fæðingarorlofi virðist langt komin nú þegar. Í ríkisfjármálaáætlun áranna 2016–2019 er gert ráð fyrir að auka við einum milljarði króna til fæðingarorlofs á árunum 2017–2018 og eins hefur svigrúm skapast þar sem greiðslur fæðingarorlofs og fæðingarstyrkja á þessu ári eru nokkuð innan heimilda. Af hverju það er veit ég ekki en ein nærtæk ágiskun er að ekki fæðist jafn mörg börn og reiknað var með. Sjá nánar hér: https://www.velferdarraduneyti.is/frettir-vel/hamarksgreidsla-i-faedingarorlofi-haekkar-i-500000-kr-a-manudi

Sbr. þetta:

"Horft yfir undanfarna hálfa öld hefur jafnt og þétt dregið úr barneignum og Ísland færst nær Evrópuþjóðum. Gjarnan er talað um að fæðingartíðni þurfi að vera hærri en 2,1 til að viðhalda mannfjöldanum en á Íslandi hefur fæðingartíðni verið lægri en 2,1 nær allar götur frá 1995 ef frá eru talin árin 2008-2011. Síðan þá hefur hún tekið skarpa dýfu niður á við en líkt og sjá má af gögnum Hagstofunnar var fæðingartíðni á síðasta ári 1,805 og því aldrei verið lægri."

Tilv. heimild hér: http://www.asi.is/media/312550/faedingartidni-aldrei-verid-laegri-en-arid-2015.pdf